About Bible Thianghlim | ©

BibleThianghlim – ROM

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

ROM

  • A ngantu: Paul
  • A siartu: Rom khawpi ih zumtupawl
  • Ngan kum: A.D. 56

Thukham Thar san laiah Rom uknak in Mediterranean kiangkap ram a rak huap ṭheh ih, a ram pumpi ih an khawpi cu khawpi tûm zet Rom a si. Hi khawpi ropi ah Pathian in kawhhran ropi a rak dĭn ih, apostol Paul cun cuih kawhhran ih va thlen a câk zet (Rom 15:23). A netnakah A.D. 60 ah cuih hmun a thlengngah nân, Rom uknak hnuaiih thawngtla pakhat dinhmun ih va thleng mi a si. Paul ih cakuat dang hmuahhmuah deuhthaw hi a tlawn hai hnuih a kuat mi an si, asinan Rom cakuat bélte hi cu a va tlawn hlanih a kuat mi a si. Hi kawhhran hi amai dĭn mi a si lo. Paul in Rom 15:20 ih a simdān vek asile, Rom kawhhran hi Peter ih dĭn mi a si ti khal rinhlelh ding a um. Rom ihsin Jerusalem ih a fehtu Jew hrekkhat Pentikos ni ah Khrih an cohlan a zumum (Apo 2:10). Cumi hnuah an umnak Rom khawpi ih an kirsal tikah kawhhran an rak dĭn a si thei. Cuihhleiah Paul in cutawk ih zumtu tampi fiang zetin a thei hai (Rom 16 zoh aw). Cuihtlunah cutawk ih zumtu hrekkhat cu Paul in peng dangih rawng a bawl laiih piangthar an si men thei.

Hi cakuat hi Paul in Masidonia le Akhai rampawl ih a rawngbawlnak a ṭheh hnuih a ngan mi a si (Rom 15:22-33 zoh aw). Zentel khawhhranpawl hnen ihsin a khawnkhawm mi sumpai kha Jerusalem ih zumtu mifarahpawl hnenah va pe dingin, Jerusalem lam panin Paul cu kirsal lohli a tum. Cumi hlan Korinth khua ih thla thum sung rawng a bawlnak cem lamah, Rom cakuat hi Paul in A.D. 56 hrawngih a ngan mi a si ding (Apo 20:3).

Hi cakuat sungah Khristian thurin ih a thupi mi thu tampi kan hmu thei. Minung in thuthangṭha zarin Pathian dingfelnak a co theidān thu cu hi cakuat hin a simfiang. Mi hmuahhmuah cu thiamloconak hnuaiih um an si thu (bung 1-3), Khrih zumtupawl thiam coter an si thu (bung 3-5), cuih zumtupawl cu thianhlimter an si thu (bung 6-8), Pathian in a fimnak in Israel a hrildan thu (bung 9-11) le zumtu hmuahhmuah in a dingfel mi nundān ih nung tengteng ding kan si thu (bung 12-16) pawl tla hi cabu hin in sim. Thuthangṭha cu «a zumtu hmuahhmuah rundamnak hrangih Pathian huham,» rori a si (1:16).

Thuhlawm Ṭhen

  • I. Thuhmaihruai (1:1-17)
  • II. Pathian in mi hmuahhmuah misual ah thiam lo a coter (1:18-3:31)
  • III. Pathian in Khrih zumtu hmuahhmuah thiam a coter (bung 4-5)
  • IV. Pathian in Khrih zumtu hmuahhmuah a tithianghlim (bung 6-8)
  • V. Pathian in a dingfelnak cu Israel a hrilnak in a langter (bung 9-11)
  • VI. Pathian in dingfelnak nun ih nung dingin zumtu a beisei (12:1-15:13)
  • VII. Thukharnak (15:14-16:27)

1

Cibaibûknak

1 Jesu Khrih-ih ṭemṭawn sál, apostol si dingih kawh mi, Pathian thuthangṭha hrangih serhhran mi keimah Paul in, 2 cuih thuthangṭha cu hlanlai ah a profetpawl hmangin Cathianghlim sungah Pathian in a rak tiamkam cia a si. 3 Cumi cu a Fapa, kan Bawipa Jesu Khrih-ih thuhla a si. Taksa dān ah cun anih cu David cithlah ihsi ra mi a si. 4 Mithi lak ihta thawhter a sinak in anih cu thianhlimnak Thlarau in Pathian Fapa a si ti huham thawn a phuanglang. 5 Amai hmin ruangah miphunpawl hmuahhmuah lakah zumnak thulun a si theinak dingah amah thawngin zangfahnak le Apostol sinak kan co a si. 6 Nannih khal anmah lakah Jesu Khrih ih kawh mi nan si.

7 Pathian ih duhdawt mi, mithiang si dingih kawh mi, Rom ih a um mi nan zate hnenah ca ka lo kuat.

Pathian kan Pa le Bawi Jesu Khrih hnen ihsin nan hnenah zangfahnak le hnangamdaihnak um hram seh.

Rom Tlawn Duhnak

8 Nan zumnak cu leitlun pumpi ih a thansuak ruangah, nan zate hrangah Jesu Khrih zarah a hmaisabikah ka Pathian hnenah lungawi thu ka sim. 9 Ziangahtile catbang loin ka thlacamnak ah ka lo telh ringring ti cu a Fapaih thuthangṭha phuannak ah ka thinlung zateih ka rĕn mi Pathian cu i theihpitu a si. 10 Tu thlang talih Pathian remtinak in nan hnenih rat theinak lamzin ziangmawtitiih hmu thei dingin ka ngen ringring. 11 Ziangahtile nan hngeh theinak dingah, thlarau thilpek hrekkhat lo pe dingin lo hmuh ding ka hiar zet. 12 Cuih thlarau thilpek cu nan zumnak le ka zumnak hmangin tha kan peawtăwn ding ka tinak a si.

13 Unaulenuh, Zentel dangpawl hnen vekin nan hnen khalih rah ka neih theinak dingah, vei tampi nan hnenih rat ka tum ṭheu ti atu ah thei loih nan um ding ka duh lo. Asinan atu tiang khamtu a um.

14 Grikmipawl hnen le aBarbaros-pawl hnenah, mifimpawl le mi-âpawl hnen khalah leiba ka nei. 15 Cun Rom ih a um mi nanmah hnen khalah thuthangṭha ka ti theipatawpih phuang dingin ka tiar a si.

1:14a Barbaros: Grik si lo mi, cathiam lo mi.

Midingfel cu Zumnak in a Nung

16 Ziangahtile Khrih thuthangṭha cu ka zahpi lo, ziangahtile a zumtu pauhpauh hrangah rundamnak dingih Pathian huham a si. A hmaisa ah Jew-mi hrangah a si ih, Grikmi hrang khalah a si ve. 17 Ziangahtile,

«Mifel cu zumnak in a nung ding,»

tiih ngan vek khan, thuthangṭha ah Pathian dingfelnak cu zumnak ihsin zumsinnak ah phuanlăng a si.

Midingfel lo parih Pathian Thinlingnak

18 Ziangahtile an dingfellonak ih thutak hupbĕttu, minungpawlih Pathian ngaihsaklonak le dingfellonak hmuahhmuah parah, Pathian thinlingnak cu van ihsin a rung lang. 19 Pathian thuhla an theih ding mi cu Pathian in an hnenih a lăngfiangter zo ruangah anmah ah a langfiang a si. 20 Ziangahtile a sersiam mi thilpawl ihsin mit ih hmuh thei lo mi Pathian ih thil umpawl cu leilung sersiam thăwk ihsin fiang zetih hmuh an si, Pathian-ih kumkhaw huham le Pathian-ih sinak tiang hman theihthiam an si. Curuangah puhmawh ding an nei lo.

21 Pathian thei na cingin, amah cu Pathian vekin an sunlawih lo ih, lungawi thu khal an sim lo ruangah, an khawruahnak cu thulolak menah a cang sawn ih, an thinlung â cu thim ih khat ah a cang. 22 Kan fim tiah an tiaw nân, mi-â ah an cang. 23 Cule a ṭawihrál thei lo mi Pathian-ih ropitnak cu a ṭawihrál thei mi minung lem, vâtepawl, ramsapawl le băwkvâkpawl lem ah an thleng.

24 Curuangah anmah le anmah lakah anmai taksa rori hman ningzakza ih hmang dingin, an thinlung câkhiarnak vekin Pathian in anmah cu bawrhhlawhnak ah a ap hai. 25 Pathian thutak cu thuphan ah an thleng ih, Sersiamtu hnakin sersiam mi thil sawn cu bia le rianin an um. Sersiamtu cu kumkhuain thangṭhatin um seh. Amen.

26 Cumi ruangah Pathian in annih cu ningzakza hurnak ah a ap hai. Ziangahtile an nunaupawl hman in an nunau sinak a dankēl vekih hmang loin, nunau tidān kalhzawngin an hmang. 27 Cutivek thothoin mipapawl khal in nunau thawi pawlawkdankēl cu an bansan ih, pakhat le pakhat sūpaw thei lo câkhiarnak in an ît-aw. Mipa in mipa dang hnenah ningzakza thilsual an tuah ih, an thilsual tuah ruangih dāntatnak an hmuh ding mi cu an co a si.

28 Cule an theihnak ah Pathian kaihhnget an duh lo ruangah, Pathian in a se linglet mi lungthin sungah thil mawi lo pawl ti dingin a ap hai. 29 Annih cu dingfellonak, nunau-mipa sualnak, sualralnak, duhhamnak, mi dang parih lungput sia neihnak, iksiknak thawi khahnak, laithahnak, tawhawknak, mi bumnak, mi dang parih thil ṭhalo tuah duhnak pawl hmuahhmuah in an khat. Annih cu hmurkâ tam, 30 mi relsiathmang, Pathian huatu, mipuarthau, mitluangkhâwng, mipawrhaw, thil ṭhalo thar tuahtu, nu le pa thulung lo, 31 theihthiamnak nei lo, rinsantlak lo, suahkeh duhdawtnak nei lo, remawknak duh lo, zahngainak nei lo an si. 32 Cuvek thilpawl a tuahtupawl cu thitlak an si tiih Pathian thuṭhennak dik cu thei cingin, anmah in an tuah lawng si loin, mi dang a tuahtupawl khal an lungkimpi.

2

Jew-pawl parih Thuṭhennak

1 Curuangah maw minung, nang mi thu a va ṭhentu zo va si khal awla, puhmawh ding zianghman na nei lo. Ziangahtile mi dang thu na va ṭhen tikah, nang khal cuvek thotho na tuah ve ruangah nangmah le nangmah thiamlo na coawter a si. 2 Asinan cuvek thil a titupawl Pathian in thu a ṭhen tikah, thutak milin thu a ṭhen a si ti kan thei. 3 Maw minung, hivek thil a tuahtupawl thuṭhensaktu, cuvek thilpawl tuah ve na cingin, Pathian in thu a ṭhen tikah ka luat ding tiah na ruat maw si? 4 Asilole Pathian ṭhatnak cun lungthlengnak ah a lo hruai ti thei loin, a ṭhatnak, mi a zāwi theinak le a thinsaunak lenziapawl tla ziang siarloin maw na um?

5 Pathian thinlingnak ni le a thuṭhennak dik a lăngter ding ni ah na luhlulnak le na thinlung na thlenglonak zulhin, nangmai hrangah thinlingnak na khawlkhawm rero a si. 6 Anih cun mi tin an ṭuan mi vek cio in a rūl ding. 7 Thinsau zetih hnaṭuan ṭha tuah ṭenṭotu le thangṭhatnak le upatnak le ṭawihrál thei lo mi a hawltu cu, Pathian in an hnenah kumkhaw nunnak a pe ding. 8 Asinan mai ṭānghma lawng sial, thutak thlun lo ih, dingfellonak a thluntupawl hnenah, Pathian in aithawknak le thinlingnak a pe ding. 9 Thil ṭhalo a tuah vivo tu mi kip parah harsatnak le ānhainak a thleng ding. Jew-mi parah a thleng hmaisa ding ih, Grikmi par khalah a thleng ding. 10 Asinan thangṭhatnak le upatnak le hnangamdaihnak cu thil ṭha a tuahtu mi kip hnenah a thleng ding. Jew-mi hnenah a thleng hmaisa ding ih, cuṭhehin Grikmi hnen khalah a thleng ding. 11 Ziangahtile Pathian in mi thleidăn a nei lo.

12 Curuangah Dān tel loih thilsual a tuahtupawl hmuahhmuah cu Dān tel loin an hlorál ding ih, Dān hnuaiih thilsual a tuahtupawl hmuahhmuah cu Dān hmangih thuṭhen an si ding. 13 Ziangahtile a theih men lawngih Dān a theitupawl cu, Pathian mithmuhah midingfel an si lo, cuhnakin cuih Dān a thluntupawl cu thiam coter an si sawn ding. 14 Ziangahtile Dān nei lo tu Zentelpawl in an pianphung sinak in Dān ih a ngĕn mi an tuah tikah, cumi cu anmai hrangah dān a si. 15 Cuih minungpawl cun Pathian in an thinlung ah Dān ih thil ti a ngan cia zo ti an langter. Cucu an sia le ṭha theihnak khalin a theihpi a si. An ruahnak cun anmah a mawhthluk thūl, a hum thūl. 16 Jesu Khrih hmangin Pathian in minungpawlih tuahthup mipawl cu thuṭhen ni ah ka thuthangṭha milin thu a ṭhen ding.

Mosi Dān le Thuṭhennak

17 Ngai hnik, nang cu Jew-mi tiih kawh na si. Dān parah na ṭhumaw ih, Pathian ah na tluangkhâwng. 18 Cule Pathian duh zawng na thei ih, Dān ihsin an lo zirh zo ruangah thil ṭha zetpawl cu na pawm. 19 Cule mitcaw hruaitu ah, thim lakih umpawlih tleu ah, 20 mi-âpawl nun zirhtu ah, nausenpawl zirhtu ah, Dān ah theihnak le thutak nei ih na rintawkawk asile, 21 nang mi dang zirhtu, nangmah le nangmah na zirhaw lo maw si? Fifir lo dingih simtu, nangmah in na ru ding maw? 22 «Uire hlah,» tiih titu, nangmah riangri na uire maw? Nang milempawl fihtu, milem temple-pawl ih thil an ret mipawl na suam maw? 23 Nang, Dān thu ih tluangkhâwngtu, Dān na pahbălnak in Pathian ziang na siar lo a si lo maw? 24 Ziangahtile,

«Nangmah ruangah Pathian hmin cu Zentelpawl lakah thangsiat a si,»

tiih ngan vek khan a si.

25 Ziangahtile Dān na thlun a si ahcun, serh zim tannak hi a hlawk taktak ko. Asinan Dānpahbăltu na si ahcun, na serh zim tannak cu serh zim tan lo vekah a cang. 26 Curuangah serh zim tan lo mi pa in Dān ih a ngĕn mi dingfelnakpawl a thlun asile, a serh zim tanlonak cu serh zim tan ah pawmsak a si lo ding maw? 27 Cule nannih ngan mi Dān neitu le serh zim tan mi hman, dānpahbăltu nan si ahcun, taksa dān ih serh zim tan lo mi pa in Dān a thlun famkim a si ahcun, thu a lo ṭhen lo ding maw?

28 Ziangah cutin ka ti tile, a leng lamih Jew-mi cu, Jew-mi taktak a si lo ih, leng lam titsa men serh zim tannak khal serh zim tannak taktak a si lo. 29 Asinan sung lamih Jew a si mi cu Jew-mi taktak a si. Serh zim tannak taktak cu thinlung serh zim tannak hi a si. Cumi cu Thlarau in a si ih, Dān thu ngan mi in a si lo. Anih cu milaipawl ih an thangṭhat mi si loin, Pathian ih lăwm mi a si sawn.

3

1 Cuti asile Jew-mi in ziang hlawknak a nei? Asilole serh zim tannak in teh ziang ṭhathnemnak a nei? 2 A ṭhathnemnak phun tampi a um! A hmaisabikah Pathian kamsuakthupawl kilter an si ruangah a si. 3 Ziangahtile mi hrekkhat in an zum lo ah teh ziang a cang ding? An zumlonak cun Pathian rinumnak cu ṭhahnem lo ah a cangter ding maw? 4 Cangter lamlam hlah! Pathian cu midik si-aw sehla, mi kip hi thuphan per si sawn hai seh.

«Na kamsuakthupawl ah nang cu thiam na co thei ding ih,
Thuṭhen na si tikah na neh hai ding a si,»

tiih ngan vek khan a si.

5 Asinan kan dingfellonak in Pathian dingfelnak a lăngter a si ahcun, ziangso kan sim ding? Pathian in a thinlingnak kan parih a thlenter tikah, anih cu midik lo a si ding maw? Minung ṭawng vekin ka ṭawng a si. 6 Si lamlam hlah! Cutin rak si ta hnik sehla, ziangtin Pathian in leitlun mi thu a ṭhen ding?

7 Ziangahtile thuphan ka pernak in Pathian-ih thutak cu a cakter sinsin ih, thangṭhat a co sinsin asile, ziangahso kei cu Pathian in misual vekih thu i ṭhen? 8 Ziangahso, «Thil ṭha a suah theinak dingah thil ṭhalo kan tuah pei?» tiah kan ti men lo. Mi hrekkhat in cutivekin an ṭawng a si tiah thuphan in puh. Cuvek mipawl thiamlo an co cu thildik a si.

Mi hmuahhmuah in Sual an Tuah Ṭheh

9 Cuti asile ziangtin? Kannih Jew-pawl hi annih hnakin kan cungnung cuang maw? Cungnung cuang lamlam hlah! Ziangahtile Jew-pawl le Grikpawl zaten sual hnuaiah an um thluh tiah kan rak puh.

10 «Midingfel zohman an um lo, an um lo, pakhat te hman an um lo;
11 Thu heithiam zohman an um lo,
Pathian hawltu zohman an um lo.
12 An zaten an rak pial ṭheh,
Hmunkhatah miṭhahnem lo ah an cang.
Thil ṭha tuahtu zohman an um lo, an um lo, pakhat hman.
13 An dang cu a áwngaw mi thlān vek a si,
An lei in mi bumnak an ṭawng;
An hmur hnuaiah rulngân tûr a um.
14 An kâ cu camsiatnak le siatkhâtnak ṭawngkam in a khat.
15 Thisen suah dingah an ke a rang zet,
16 An lamzin ah siatralnak le vanduainak a um;
17 Cule daihnak lamzin an thei lo.
18 An mit ah Pathian ṭihzahnak a um lo,»

tiih ngan vek khan a si.

19 Cun kâ hmuahhmuah an cip ih, leitlun mi hmuahhmuah Pathian hmaiih mawh nei an sizia a lăng theinak dingah, Dān ih a sim mi kip cu Dān hnuaiih um mipawl hnenah a sim a si ti kan thei. 20 Curuangah zohman Dān thil tipawl parah ṭhumawin, Pathian mithmuhah thiamco an um lo ding, ziangahtile Dān ruangin sual theih famkimnak a um a si.

Zumnak thawngih Pathian Dingfelnak

21 Asinan Dān tel loin Pathian in a dingfelnak cu a phuanglang zo. Cucu Dān thupawl le Profetpawl ih ngan mi thupawl in an theihpi. 22 Pathian hnen ihsin a dingfelnak cu Jesu Khrih zumnak in mi hmuahhmuah hnenah le mi hmuahhmuah parah a ra. Ziangahtile Pathian hmaiah danglamnak zianghman a um lo. 23 Ziangahtile mi hmuahhmuah in sual an rak tuah ih, Pathian ropitnak an thleng bān lo. 24 Pathian in annih cu a zangfahnak in Khrih Jesu ih um mi tlennak hmangin a lakin thiam a coter hai. 25 Pathian in Jesu Khrih cu Pathian dingfelnak lăngternak ah, zumnak thawngin a thisen hmangin tlăwnlungawithawinak ah a langter, ziangruangahtile Pathian thinsaunak in tuih hlanih tuah mi sualpawl cu a lan ta a si. 26 Pathian cu midik le Jesu parih zumnak ṭhumtupawl thiam cotertu a si theinak dingah, tuih cān ah amai dingfelnak langter dingah a si.

27 Cuti asile ziangtin mi a tluangkhâwng thei ding? Tluangkhawnnak ding lamzin a um lo. Ziang dān in so a dawnkham? A ṭuannak in maw? Si lamlam hlah, zumnak dān in a dawnkham sawn a si. 28 Curuangah Dān thil ti tel loin, minung cu zumnak in Pathian in thiam a coter ti hi kan thunetnak a si. 29 Asilole Pathian cu Jew-pawl hrang lawngih Pathian a si maw? Zentelpawlih Pathian khal a si ve lo maw? Si e, Zentelpawlih Pathian khal a si ve. 30 Ziangahtile serh zim tanpawl cu zumnak in le serh zim tan lo pawl khal zumnak ih thiam cotertu Pathian pakhat a um. 31 Cuti asile zumnak thawngin Dān cu zianghmanlo ah kan canter tinak maw si? Si lamlam hlah! Cuhnakin Dān cu kan hngetter sawn a si.

4

Abraham cu Zumnak in Thiam a Co

1 Cuti asile taksa dān ih kan pa Abraham thu ah ziang kan sim ding? Ziang a hmu? 2 Ziangahtile Abraham cu a ṭuannak in thiam coter asile, Abraham in tluangkhawn ding a nei tinak a si ding, asinan Pathian hmaiah cun a nei lo. 3 Cathianghlim in ziangtin a ti? «Abraham in Pathian a zum ih, cumi cu a hrangah dingfelnak ih siarsak a si,» tiah a ti.

4 Cun mi pakhat in hna a ṭuan tikah, a ṭuan man cu zangfah thilpek tiin siarsak a si lo, leiba ih ruah a si sawn. 5 Asinan hna ṭuan loin, Pathian ngaihsak lo thiam cotertu Pathian zum sawntu hrangah cun a zumnak cu dingfelnak ah siarsak a si. 6 Cuvekin David khal in ṭuannak tel loih, Pathian in midingfel ih a siar mi pa mithlawsuak a sinak cu hitin a sim,

7 «Pathian in dān loih an thil tipawl a ngaidam mipawl le,
An sualpawl a khuhsak mi cu mithlawsuak an si.
8 Sual na cingin sual loih Bawipa ih a puh mi pa cu mithlawsuak a si,»

tiah a ti.

9 Hi mithlawsuak sinak cu serh zim tan mipawl hrang lawngah a si maw, asilole serh zim tan lo mipawl hrang khalah a si maw? Ziangahtile zumnak cu Abraham hrangah dingfelnak ah siarsak a si. 10 Ziang tikah cumi cu siarsak a si? Serh zim a tan hnuah maw, serh zim a tan hlanah? Serh zim a tan hnuah si loin, serh zim a tan hlanah a si sawn. 11 Cule Abraham cun serh zim tan hminsinnak a co ih, cumi cu serh zim tan a si hlanih a neih mi zumnak ih dingfelnak tacik a si. Cutin anih cu zumtu hmuahhmuah, serh zim tan lo mipawl hmanih pa a si theinak dingah le dingfelnak cu an hrang khalih siarsak an si theinak ding hrangah a si. 12 Cule serh zim tan mipawl lawngih serh zim tan papi si loin, serh zim tan an si hlanih kan pa Abraham in a neih mi zumnak keneh a zawhtupawlih pa khal a si.

Abraham-ih Thiamconak cu Mosi Dān Thlunnak in a Si Lo

13 Ziangahtile leitlun ro cotu ding tiih thutiamkam cu Abraham le a cithlah in Dān thawngin si loin, zumnak ih an co mi dingfelnak thawngin an ngah sawn a si. 14 Ziangahtile Dān thu ih nungpawl kha ro cotu rak si hai hnik sehla, zumnak cu thulolak men a si ding ih, thutiamkam khal santlailo ah a cang ding, 15 ziangruangahtile Dān cun Pathian thinlingnak a suah. Ziangahtile Dān a umlonak hmun ah dānpahbălnak a um lo.

16 Curuangah thutiamkam cu zangfahnak ruangin a si theinak dingah, zumnak parih ṭhumaw a si; cutin thutiamkam cu Abraham-ih cithlah hmuahhmuah, Dān parih ṭhumawpawl hnen lawngah si loin, kan zate pa a si mi Abraham-ih zumnak parih ṭhumawpawl hnen khalah a fiang thei ding. 17 «Miphun tampi pa ah ka lo tuah zo,» tiih ngan vek khan, Abraham cu mithipawl nunnak petu le thil um lo um vekih reltu a zum mi Pathian hmaiah anih cu kan pa a si. 18 «Na cithlahpawl cu khi zât khi an si ding,» tiih rak sim cia mi vekin, miphun tampi ih pa a can theinak dingah, ruahsan ding a neih lo laiah, Abraham cun ruahsannak thawn a zum.

19 Cule a taksa a thi a si ti le amah cu kum 100 a si zo ih, Sarah-ih sūl khal a thi a si ti thei na cingin a zumnak a derdai cuang riai lo. 20 Anih cu zumnak tlasamin Pathian-ih thutiamkam cu a ringhlel lo, cuhnakin zumnak ah a cak ih Pathian a thangṭhat sawn. 21 Cule Pathian in a tiamkam zo mi cu a tuahsuak thei a si ti a theifiang. 22 Curuangah «cumi cu a hrangah dingfelnak ah siarsak a si.»

23 «Cumi cu a hrangah siarsak a si,» tiih ngan mi hi Abraham hrang lawngah a si lo, 24 kan hrang khalah a si. Mithi lak ihsin kan Bawipa Jesu a thotertu Pathian kan zum asile, kan zumnak cu dingfelnak ah in siarsak ding. 25 Kan mawhsualnak ruangah anih cu hlăn a si ih, thiam kan conak dingah thawhter a si.

5

Thiamconakih Rahsuah

1 Zumnak in thiam coter kan si zo ruangah, kan Bawipa Jesu Khrih thawngin Pathian thawn remawknak kan nei. 2 Amai zarah zumnak in cuih zangfahnak sungih luhnak lamzin khal kan nei. Cuih zangfahnak ah cun kan ding ih, Pathian ropitnak ruahsanin lungawiaipuangin kan um. 3 Cule cumi lawng si loin, harsatnak kan neih tik khalah, cumi ah cun kan ai a puang a si. A săn cu harsatnak in tuarfainak a suakter ti kan thei. 4 Cule tuarfainak cun tawntehnak a suakter ih tawntehnak cun ruahsannak a suakter. 5 Cun ruahsannak cun kan ning in zakter lo, ziangruangahtile Pathian in kan hnenih in pek mi Thlarau Thianghlim hmangin kan thinlung ah a duhdawtnak a burh zo.

6 Ziangahtile cahnak nei lo kan si laiah, a cān teah Khrih cu Pathian ngaihsak lo pawl hrangah a thi. 7 Ziangahtile midingfel hrangih mi pakhat thih ding cu thil vâng zet a si; miṭha hrangah cun mi zo tal si maw an thi ngam khal a si thei. 8 Asinan Pathian in in duhdawtzia cu hitin a langter, misual kan si laiah Khrih cu kan hrangah a thi.

9 Cuihhleiah atu ah Khrih thisen thawngin thiam coter kan si zo ruangah, amah thawngin Pathian thinlingnak ihsin run kan si ding. 10 Ziangahtile a doral kan si lai hmanih, a Fapa thihnak in Pathian thawi kan remawk zo a si ahcun, remaw zo kan si hnuah cun, a Fapaih nunnak in in rundam sinsin ding. 11 Cule cuti lawng si loin, kan Bawipa Jesu Khrih thawngin Pathian hnen khalah lungawiaipuangin kan um, atu ah Jesu Khrih thawngin remawknak kan co zo.

Adam ah Thihnak, Khrih ah Nunnak

12 Curuangah mi pakhat ruangin leitlun ah sual a lut ih, cuih sual ruangah leitlun ah thihnak a luh vekin, thihnak in mi hmuahhmuah a fángsuak, ziangruangahtile mi hmuahhmuah cu an sual thluh zo. 13 Ziangahtile Dān a thlen hlanah leitlun ah sual a um zo, asinan Dān a um lo laiah, sual cu sual ih siar a rak si lo. 14 Sihmansehla Adam ihsin Mosi tiang Adam-ih dānpahbăl mi vek sual a tuah lo tupawl par khalah thihnak in a uk. Adam cu a ra ding mi pa hmuhsaknak a si.

15 Asinan alakih thilpek cu Adam-ih mawhsualnak vek a si lo. Ziangahtile mi pakhat ih mawhsualnak ruangah mi tampi an thih a si ahcun, Pathian zangfahnak le mi pakhat, Jesu Khrih thawngih a ra mi zangfah thilpek ruangah cun mi tampi hnenah a luangliam sinsin ding. 16 Cule cuih alakih thilpek cu mi pakhat sualnak ruangih thil ra thleng mi vek a si lo. Ziangahtile thuṭhennak cu mi pakhat sualnak ruangah thiamlo mi coter dingah a thleng. Asinan thilsual tuahnak tampi ruangih alakih thilpek cun thiamconak a thlĕn a si. 17 Ziangahtile mi pakhat ih mawhsualnak ruangah, cuih mi pakhat ruangah thihnak in a uk asile, a luangliam mi zangfahnak le dingfelnak thilpek cotupawl in nunnak ah mi pakhat, Jesu Khrih thawngin an uk sinsin ding.

18 Curuangah mawhsualnak pakhat ruangah mi hmuahhmuah hnenah thiamloconak a thleng. Cuvek thothoin, dingfelnak thil ti pakhat in mi hmuahhmuah hnenah nunnak ngah theinak thiamconak a thlĕn a si. 19 Ziangahtile mi pakhat ih thulunlonak ruangah mi tampi cu misual ih canter an si bangin, mi pakhat ih thulunnak thawngin mi tampi cu midingfel ih canter an si ding.

20 Cuihtlunah mawhsualnak a karh theinak dingah, Dān a ra thleng. Asinan sual a karhnak hmun ah zangfahnak a luangliam sinsin. 21 Cuticun sual cun thihnak ih a rak uk dah bangin, zangfahnak cun Jesu Khrih kan Bawipa thawngin kumkhaw nunnak ah dingfelnak in a uk theinak dingah a si.

6

Sual ah Thi, Pathian ah Nung

1 Cuti asile ziang kan sim ding? Zangfahnak a karhsinnak dingah, sual ah kan umpeh vivo ding maw? 2 Umpeh lamlam hlah! Kannih sual ih thi zo, ziangtin sual ah kan nung vivo thei ding? 3 Asilole kannih Khrih Jesu ih baptisma a cotupawl hmuahhmuah hi a thihnak ah baptisma kan co a si ti nan thei lo maw? 4 Curuangah Khrih cu mithi lak ihsin paih ropitnak hmangih thawhter a si vekin, kannih khal nun thar ih kan nun theinak dingah, baptisma hmangin Khrih zawngah thihnak ah phum kan si.

5 Ziangahtile a thihnak băngnak neiin hmunkhatah zăwmawkter zo kan si ahcun, a thawhsalnak băngnak nei khalin hmunkhatah zăwmawkter kan si ding. 6 Sual taksa cu zianghman ti thei loih a umnak dingah, cutin sual rawng kan bawl nawn lonak dingah, kan minung hlun cu Khrih zawngah khĕnbet a si zo ti mi hi kan thei. 7 Ziangahtile a thi zo mi cu sual ihsin a luat zo a si. 8 Khrih zawngih kan thih zo asile, amah zawngah kan nung ve ding ti kan zum. 9 Khrih cu mithi lak ihsin thawhter a si ih, a thisal nawn lo ding ti kan thei. Thihnak in a parah thu a nei nawn lo. 10 Ziangahtile a thih tikah, sual lamah sankhuk hrangah vei khat a thi; asinan a nun tikah, Pathian lamah a nung a si.

11 Cutivek thothoin, nannih khal sual lamah thi taktak ah ruat aw uh, asinan Khrih Jesu kan Bawipa ah cun Pathian lamah nung ah ruat aw uh.

12 Curuangah nan tisa câkhiarnak thlun dingin, a thi thei mi nan taksa parah sual in lo uk hlah seh. 13 Cule nan taksa pêngpawl cu dingfellonak hmanrua vekin, sual hnenah pe hlah uh, cuhnakin mithi lak ihsi nungsal vekin, Pathian hnenah pe aw sawn uhla, nan taksa pêngpawl cu dingfelnak hmanrua vekin Pathian hnenah pe uh. 14 Ziangahtile nannih cu Dān hnuaiih um nan si lo ih, zangfahnak hnuaiih um nan si sawn ruangah, sual in nan parah thu a nei nawn lo ding.

Dingfelnak Sál Ah

15 Cuti asile ziangtin? Kannih cu Dān hnuaiah um loin zangfahnak hnuaiih kan um ruangah, sual kan tuah ding maw? Tuah lamlam hlah! 16 Mi pakhat khat hnenah sál vekin a thu lung dingih nan pekawk asile, a thu nan lun mi paih sál nan si ti nan thei lo maw? Cuti asile, nannih cu thihnak ih mi hruaitu sualih sál asilole dingfelnak ih mi hruaitu thulunnakih sál nan si. 17 A hlanah cun nannih cu sualih sál nan rak si. Sikhalsehla nan hnenih pek mi zirhnak nan thinlung in nan lun ruangah, Pathian hnenah lungawi thu ka sim a si. 18 Cule sual ihsin luatter nan si zo ruangah, nannih cu dingfelnakih sál ah nan cang.

19 Nan taksa a cah lo ruangah minung dān in thu ka sim a si. Nan taksa pêngpawl cu a bawrhhlawh mi thil lamah le dān loih nunnak lamah sál vekin nan rak pe. Cuih dān loih nunnak cun dān loih nun sinsinnak ah a hruai. Cuvekin atu ah nan taksa pêngpawl cu thianhlimnak ih hruaitu dingfelnak sál vekin pe uh. 20 Ziangahtile nannih cu sualih sál nan si laiah, dingfelnak in a lo uk lo. 21 Atu ih nan zahpi mi thilpawl in khaih cān ah ziang hlawknak so a lo pek? Ziangahtile cuih thilpawlih cemnetnak cu thihnak a si. 22 Asinan atu ah cun sual ihsin luatter nan si zo ih, Pathian sál ah nan cang zo. Thianhlimnak le a netnakih kumkhaw nunnak ih hruaitu rah nan nei. 23 Ziangahtile sualih hlawhman cu thihnak a si, asinan Pathian thilpek bélte cu Khrih Jesu kan Bawipa thawngin kumkhaw nunnak a si.

7

Mosi Dān lamih Thi, Pathian lamih Nung

1 Dān a theitu nanmah hnenah ka lo sim a si, unaulenuh, Dān cun mi pakhat parah a nunsung lawng a uk ti nan thei lo maw? 2 Ziangahtile pasal nei mi nunau cu a pasal a nunsung lawng Dān in a pasal parah a ṭemṭawn a si. Asinan a pasal a thih ah cun a pasalih Dān ihsin anih cu a luat. 3 A pasal a nun laiah cu nu cu mipa dang thawi an neihawk asile, cu nu cu uire tiah an ti ding; asinan a pasal a thih a si ahcun, cu nu cu cuih Dān ihsin a luat ih, mi dang thawi an neihawk a si hmanah uire a si lo.

4 Curuangah ka u le ka nau tla, Pathian lamih rah kan rah theinak dingah, mi dang, mithi lak ihsin thawhter mi ih ṭhit mi nan si theinak dingah nannih khal Khrih-ih taksaruangpum thawngin Dān lamah mithi ah nan cang. 5 Ziangahtile tisa ih kan um laiah, Dān in a cawkthawh mi câkhiarnak cak zet cun kan taksa pêngpawl ah thihnak suah dingin hna a ṭuan. 6 Asinan Dān thu ngan mi lamzin hlun in si loin, Thlarau lamzin thar in Pathian kan rĕn theinak dingah, atu ah cun in kaitangtu lakah thi zo in, Dān ihsin runsuah kan si zo.

Sual thawi Buanawknak

7 Cuti asile ziang kan sim ding? Dān cu sual a si maw? Si lamlam hlah! Cuhnakin Dān ihsi lo cun sual cu ziang a si ti ka thei lo ding. Ziangahtile Dān cun, «Mi thil na daw lo pei,» ti lo sehla, mi thil dawt cu sual a si ti ka thei lo ding. 8 Asinan sual cun thupek cu remcângah lain, keimah ah câkhiarnak phunphun a umter. Ziangahtile Dān um lo cun sual cu a thi a si. 9 Vei khat laiah Dān tel loin ka rak nung dah, asinan thupek a ra thlen tikah, sual cu a nungsal ih, kei cu ka thi. 10 Cule nunnak thlĕntu ding thupek cun ka hnenah thihnak a thlĕn ti ka hmusuak. 11 Ziangahtile sual cun thupek cu remcângah lain i bum ih, thupek hmangin i that. 12 Curuangah Dān cu a thianghlim ih, thupek khal a thianghlim, a dingfel ih ṭhat khal a ṭha.

Mizia Pahnih thawi Buanawknak

13 Cuti asile thil ṭha cu ka parah thihnak ah a cang maw si? Cang lamlam hlah! Cuhnakin sual cu sual a sizia a lăngnak dingah sual cun thil ṭha hmangin keimah ah thihnak a suahter riangri, cutin thupek hmangin cuih sual cu sual sinsinih a lăng theinak dingah sual cun keimah ah thihnak in a ṭuan a si. 14 Ziangahtile atu ah Dān cu thlarau lam thil a si ti kan thei, asinan kei cu sual hnuaiih zuar mi tisa mi ka si. 15 Ziangahtile ka thil tuah mi hi ka theithiam lo. Ziangahtile tuah ding ka duh mi ka tuah lo ih, ka huat mi ka tuah sawn riangri. 16 Cutiih tuah ding ka duh lo mi ka tuah asile, Dān cu a ṭha a si tiah ka lungkimpi tinak a si. 17 Asinan atu ah, cumi a tuahtu cu keimah ka si nawn lo, ka sungih cêng sual a si sawn. 18 Ziangahtile ka sungah thil ṭha zianghman a cêng lo ti ka thei, cumi cu ka tisa ah ka tinak a si. Ziangahtile thil ṭha tuah duhnak cu keimah ah a um, asinan cumi tuahsuak theinak lamzin ka hmu thei lo. 19 Ziangahtile thil ṭha tuah ka duh mipawl ka tuah lo ih, tuah ding ka duh lo mi thil ṭhalo pawl ka tuah sawn ṭheu a si. 20 Atu ah tuah dingih ka duh lo mi ka tuah asile, cumi a tuahtu cu keimah ka si nawn lo, ka sungih cêng sual a si sawn.

21 Curuangah thil ṭha tuah ka duh tikah, thil ṭhalo ka hnenah a um ti mi dān hin keimah ah hna a ṭuan ti ka hmusuak. 22 Ziangahtile ka sung lam minung cu Pathian Dān ah a lung a awi zet. 23 Asinan ka lungthin dān dokalhtu ka taksa pêng ah dān dang ka hmu, cumi cun ka taksa pêngpawl ih ṭuantu sual dānih sál ah i hruai. 24 Aw ka dinhmun hi a va harsa lawmmam ve! Hi thihnak taksaruangpum ihsin zo in so i runsuak ding? 25 Jesu Khrih kan Bawipa thawngin Pathian hnenah lungawi thu ka sim a si! Curuangah keimah rori cun ka lungthin thawn Pathian Dān ka rian, asinan ka taksa cun sual dān a rian a si.

8

Thlarau thawngih Nunnak

1 Curuangah atu ah cun tisa duhzawngih nung loin, Thlarau duh zawng sawnih a nungtu, Khrih Jesu ih a um mipawl hrangah cun thiamloconak a um nawn lo. 2 Ziangahtile Khrih Jesu thawngin Khrih Jesu ah nunnak Thlarau dān cun sual le thihnak dān ihsin i luatter zo. 3 Ziangahtile tisa ruangah Dān cu a cak lo ih tisa in a tuah thei lo mi cu Pathian in amai Fapa rori misual piankengin sual hrangih raithawinak ah a run thlah ih, taksaruangpum ah sual cu thiamlo a coter. 4 Tisa duhzawngih nung loin, Thlarau duh zawng sawnih a nungtu kanmah ah Dān ih ngĕn mi dingfelnak a famkim theinak dingah a si.

5 Ziangahtile tisa duhzawngih a nungtupawl cun tisa lam thilpawl an ruat, asinan Thlarau duhzawngih a nungtupawl cun thlarau lam thilpawl an ruat. 6 Ziangahtile tisa lamzin ruah cu thihnak a si, asinan thlarau lamzin ruah cu nunnak le hnangamdaihnak a si. 7 Ziangruangahtile tisa lamzin ruah cu Pathian doral sinak a si. Ziangahtile tisa cu Pathian Dān ah a tlulut lo ih, a tlulut thei lo taktak. 8 Curuangah tisa ih umpawl cun Pathian lung an hmuiter thei lo.

9 Asinan nannih cu tisa ih um nan si lo, Pathian Thlarau nanmah ih a cēn asile nannih cu Thlarau ah nan um a si. Asinan zokhal Khrih Thlarau nei lo tu cu Khrih-ih ta a si lo. 10 Cule Khrih cu nan sungih a um asile, sual ruangah taksa cu a thi. Asinan dingfelnak ruangah Thlarau cu nunnak a si. 11 Asinan mithi lak ihsin Jesu a thotertu Pathian Thlarau nan sungih a cēn asile, mithi lak ihsin Khrih a thotertu in nan sungih cêng a Thlarau thawngin a thi thei mi nan taksa cu nunnak a pe ve ding.

12 Curuangah u le nau tla, leiba kan nei, asinan tisa duhzawngih nung dingin tisa ah cun a si lo. 13 Ziangahtile tisa duhzawngih nan nun asile, nan thi ding. Asinan Thlarau in cuih taksa thil tipawl nan thah asile, nan nung ding. 14 Ziangahtile Pathian Thlarau ih a hruai mipawl hmuahhmuah cu Pathian fāte an si. 15 Ṭih ih um dingin sál ih lo tāngsaltertu ding Thlarau nan co lo ih, fa sinak Thlarau nan co sawn a si. Cuih Thlarau in, «Abba, ka Pa,» tiin kan ausuak. 16 Pathian fāte kan si ti cu Thlarau rori in kan thlarau a theihfiangter. 17 Cule fa kan si ruangah, ro cotu khal kan si ih, Pathian ro cotu le Khrih ro copitu kan si. Amah zawngih kan tuar taktak asile, sunlawihtlang khal kan si ding.

Tuarnak ihsin Ropitnak Ah

18 Ziangahtile tuih cān ih kan tuarnakpawl hi kan hnenih phuanlăng leh ding mi ropitnak thaw cun tahṭhim tlakah ka ruat lo. 19 Ziangahtile Pathian falepawl lăng lehnak ding cu sersiam mipawl in beiseinak dik thawn hlawptlo zetin an hngak a si. 20 Ziangahtile sersiam mipawl cu zianghmanlo hnuaiih ret an si. Anmai duh ruangah si loin, a umtertu in ruahsannak thawn a umter a si sawn. 21 Ziangruangahtile sersiam mipawl rori khal ṭawihralnak sál ihsin luatter an si ding ih, Pathian fātepawl zalĕnnak ropi sungah luhter an si ding.

22 Ziangahtile sersiam mi hmuahhmuah cu atu tiangin hrûm le fahrinnat tuar vekin an umtlang a si ti kan thei. 23 Culawng si loin, rah hmaisabik a si mi Thlarau a neitu kanmah rori khal kan sung lam ihsin fa sinak a si mi, kan taksaruangpum tlennak cu hlawptlo zetih hngakin kan hrûm rero. 24 Ziangahtile kannih cu ruahsannak ah rundam kan si. Asinan hmuh thei mi ruahsan cu ruahsannak a si lo. Ziangahtile zo in so a hmuh mi thil cu a ruahsan nawn ding? 25 Asinan kan hmuh lo mi kan ruahsan asile, hlawptlo zetin thinsaunak thawn kan hngak ṭenṭo ṭheu.

26 Cuvek thothoin Thlarau cun kan ṭawnṭaihnakpawl ah in bawm. Ziangahtile ziang hrangah thla kan cam ding ti kan thei lo, asinan Thlarau rori cun ṭawngkam ih sim theih lo khawpih hrûmin in ngensak. 27 Thinlung cektu cun Thlarau-ih lungthin khal a thei, ziangruangahtile Thlarau cun Pathian duhzawngin mithiangpawl hrangah a ngensak.

28 Cule Pathian a duhdawtu, amai tumtah mi vekih a kawh mipawl hrangah thil ziangkim hin an ṭhatnak dingah an ṭuantlangkhawm a si ti kan thei. 29 Ziangahtile Pathian in a theih cia mipawl cu a Fapa băngnak ih thlengaw dingah a ruat cia hai, cutin Fapa cu unau tampi lakah fatir a si thei ding a si. 30 Cuihhleiah Pathian in a ruah cia mipawl cu a ko hai fawn; a kawh mipawl cu thiam a coter hai ih, thiam a coter mipawl cu a sunlawih hai fawn.

Kumkhaw Duhdawtnak

31 Cuti asile hi thilpawl thuhla ah ziang kan sim ding? Pathian kan lamih a ṭan ah cun, zo in so in do thei ding? 32 Amai Fapa rori hman ui loin, kan zate hrangih petu cun, thil hmuahhmuah khal a Fapa zawngah a lakin in pe cih loin a um ding maw? 33 Pathian ih hril zo mi cu zo in so sual a puh ding? Thiam a cotertu cu Pathian a si. 34 Thiamlo mi cotertu cu zo a si? A thi tu cu Khrih a si, cuihhleiah anih cu mithi lak ihsin thawhter a si ih, Pathian vawrh lam rori ah toin kan hrangih in ngĕnsaktu cu Khrih a si. 35 Khrih duhdawtnak ihsin zo in so in ṭhen ding? Harsatnak in simaw, vansannak in simaw, tiduhdahnak in simaw, mangṭam in simaw, taklawngnak in simaw, ṭihphannak in simaw, ralnâm in simaw in ṭhen thei ding maw?

36 «Nangmah ruangah sunnivu thahin kan um;
Kannih cu sathattu hrangih tuu vekih ruah mi kan si,»

tiih ngan vek khan a si.

37 Sihmansehla cuih thil hmuahhmuah ah cun in duhdawtu zarah nehtupawl hnakin nehtu kan si. 38 Ziangahtile thihnak in simaw, nunnak khal in simaw, vancungmipawl khal in simaw, uktupawl khal in simaw, huhampawl khal in simaw, tuih cān ih thilpawl khal in simaw, hmai lam cān ih thil um ding mi khal in simaw, 39 thil sâng khalin simaw, thil thûk khalin simaw, sersiam mi ziang thil dang hman in Khrih Jesu kan Bawipa ih um, Pathian duhdawtnak ihsin in ṭhen thei lo ti ka theifiang a si.

9

Pathian ih Israel a Hrilnak

1 Khrih ah thutak ka sim a si, thuphan ka sim lo, Thlarau Thianghlim ah ka sia le ṭha theihnak khalin in theihpi ve. 2 Cumi cu ka thinlung ih riahsiatnak nasazet le catbanglo thinnatnak ka neih mi hi a si. 3 Ziangahtile taksa dān ih ka sungkhat a si mi ka unaupawl aiah, keimah rori hi Khrih hnen ihsin ṭhenin, camsiat tiang hman si ningla ka duh. 4 Annih cu Israel-mi an si ih, fa sinak, ropitnak, thukhampawl, Dān peknak, Pathian rawngbawlnak le thutiamkampawl tla anmai ta a si; 5 pupápawl khal anmai ta an si ih, Khrih cu taksa dān ih a sungkua a si mi anmah hnen ihsin a ra. Amah cu ziang hmuahhmuah tlunih Pathian a si, kumkhuain amah cu thangṭhat si ko seh. Amen.

6 Asinan Pathian kamsuakthu a hlawhsam tinak a si lo. Ziangahtile Israel-ih tesinfa hmuahhmuah Israel diktak an si thluh lo. 7 Cuvek thothoin Abraham cithlah an si ruang khalah Abraham fāte ngaingai an si thluh cuang lo. «Isak ah na cithlah tiih kawh a si ding,» ti a si sawn.

8 Cucu, taksa dān ih fātepawl cu Pathian fāte an si lo ih, tiamkam fātepawl cu cithlah ih pawm an si sawn tinak a si. 9 Ziangahtile, «Himi bikhiah mi cān ah ka rasal ding ih, Sarah in fapa a hring ding,» ti hi thutiamkam kamsuakthu cu a si.

10 Cule culawng si loin, Rebeka khal in mi pakhat, kan pa Isak hnenin fa a vun tikah, 11 fa a hrin hlan, a falepawl in a sia le a ṭha zianghman an tuah hlanah, hrilnak thu ih Pathian thil tum a hngeh theinak dingah, Pathian in cutin a tuah. Cucu thil ti parih ṭhumaw si loin, a kotu parih ṭhumaw a si sawn. 12 Rebeka hnenah, «A upadeuh in nautadeuh a rian ding,» tiih sim a si.

13 Cumi cu,

«Jakob cu ka duhdawt, asinan Esau cu ka hua,»

tiih ngan mi vek khan a si.

14 Cuti asile ziang kan sim ding? Pathian cu a dingfel lo maw si? Si lamlam hlah! 15 Ziangahtile Pathian in Mosi hnenah, «Zahngai ka duh mi parah zah ka ngai ding ih, lainat ka duh mi parah ka laina ding,» tiah a ti.

16 Cuti a si ruangah a duhtu le a tlân rero tu milai hnen ihsin a si lo ih, zahngainak a hmuhtu Pathian hnen ihsin a si sawn. 17 Ziangahtile Cathianghlim in Faro hnenah, «Leitlun pumpuluk ah ka hmin aupi a si theinak dingah le nangmah ah ka huham ka lăngter theinak dingah, cuih tumtahnak rori hrangah nang cu ka lo tungding a si,» tiah a ti.

18 Curuangah Pathian cun zahngai a duh mi parah zahngainak a nei ih, thinlung hahter a duh mi parah a hakter.

19 Nang in ka hnenah, «Cuti asile ziangahso Pathian in mawhsualnak a hawl hrih? Zo in a duhnak cu a dokalh?» tiah thu i sut ding maw? 20 Asinan thungaiten, maw nang milai! Pathian kalh zawngih let ngamtu nang cu zo na si? Thil tuah mi in a tuahtupa hnenah, «Ziangah hivekin i tuah?» tiah thu a sut ding maw? 21 Beltuahtu in bellei parah thuneihnak a nei a si lo maw? Bellei bangrep ihsin bel pakhat cu sunglawi zetih hman dingah le a dang bel pakhat cu a menmenih hman dingah tuah dingin beltuahtu in bellei parah thuneihnak a nei a si lo maw?

22 Pathian cun a thinlingnak lăngter le a huham theihter duh khal sehla, thinlingnak a cotu dingpawl parah le an siatnak ding a timlamsak mi thinhengnak belpawl parih thinsaunak nasazet thawi a zāwi hai ah teh, ziang sim ding kan nei? 23 Cule hlan ihsi a rak timtuah hai mi zah a ngai mi belpawl parah a ropitnak lenzia a lăngter theinak dingah a si. 24 Kannih hi a kawh mipawl cu kan si, Jew-pawl lak ihsi lawngin si loin, Zentelpawl lak ihsi khalin in ko a si. 25 Hosea cazual sungah Pathian in,

«Ka mi a si lo pawl kha, ka mi, tiah ka ko hai ding ih,
Ka duhdawt lo mi nu kha, ka duhdawt mi nu na si, tiah ka ti ding,»

tiah a ti.

26 «Cule hitin a si ding, an hnenah,
Nannih cu ka minung nan si lo, tiih a rak tinak hmun ah khan,
Nannih cu a nung mi Pathian fapapawl, tiah kawh an si ding,»

tiah a ti.

27 Isaiah khal in Israel thuhla ah,

«Israel-mipawl cu tipithuanthum kapih vunnel zât in tam hman hai sehla,
A tāngsŭn lawng rundam an si ding.
28 Ziangahtile Pathian in hna cu a cemnet tiang a ṭheh ding ih, dingfelnak in a tántâwi ding.
Ziangruangahtile Bawipa in leitlun ah hna cu a tâwiter ding,» tiah a au.
29 Cucu Isaiah in hlanlai ah, «Ralkap rualpawlih Bawi in kan hnenah cithlah hrekkhat tāngter lo sehla,
Sodom vek kan si zo ding ih, Gomorrah vekin tuah kan si zo ding,»

tiih a ti vek khan a si.

Israel-ih Zumlonak

30 Cuti asile, ziang kan sim ding? Dingfelnak a dawi lo tu Zentelpawl in dingfelnak an hmungah zo. Cuih dingfelnak cu zumnak parih ṭhumaw a si. 31 Asinan dingfelnak dān a dawitu Israel-mipawl in dingfelnak dān cu an hmungah lo. 32 Ziangruangah so? Ziangruangahtile zumnak parih ṭhumaw mi dingfelnak an dawi ve lo ih, Dān thlunnak parih ṭhumaw mi dingfelnak an dawi sawn ruangah a si. Curuangah cuih bahnak lung ah cun an bah. 33 Cucu,

«Ngai hnik, Zion ah bahnak lung le tlûknak lungpi ka ret.
Zokhal amah zumtu cu ningzahter a si lo ding,»

tiih ngan vek khan a si.

10

1 U le nau tla, Israel-mipawl hrangih ka thinlung ih a duh zet mi le Pathian hnenih ka thlacam mi cu anmahpawl rundam an si ding hi a si. 2 Ziangahtile Pathian hrangah ṭhahnem an ngaizia cu ka theihpi hai, asinan an ṭhahnemngainak cu theihnak famkim thawi milawin a si lo. 3 Ziangahtile Pathian dingfelnak thei loin, anmai dingfelnak dĭnhngehter an duh tikah, Pathian dingfelnak ah an tlulut lo. 4 Ziangahtile a zumtu pauhpauh dingfelnak an hmuh theinak dingah, Khrih cu Dān cemnetnak a si.

Rundamnak cu Mi hmuahhmuah Hrang

5 Ziangahtile Mosi cun Dān parih ṭhumaw mi dingfelnak thu ah, «Cuih thilpawl a thluntu cu, cupawl in a nung ding,» tiah a ngan. 6 Asinan zumnak parih ṭhumaw mi dingfelnak cun, «Na thinlung in, ‹Vancung ah zo a kai ding?› ti hlah,» cumi cu tlun lam ihsin Khrih hruaisuk ding tinak a si, 7 asilole, «Na thinlung in, ‹Zo so a thûknak sungah a ṭum ding?› ti fawn hlah,» cumi cu mithi lak ihsin Khrih cu hruaisoh ding tinak a si, tiin a ngan. 8 Sikhalsehla cangan mi in ziang a simbêt? «Kamsuakthu cu na kiangnaite ah a um, na kâ le na thinlung ah a um,» cumi cu kan phuan mi zumnak kamsuakthu hi a si: 9 na kâ in Jesu cu Bawi a si tiah na phuang ih, na thinlung in mithi lak ihsin Pathian in a kaitho ti na zum asile, rundam na si ding. 10 Ziangahtile mi pakhat in a thinlung in a zum ih, cumi cun dingfelnak ah a hruai, cule a kâ in a phuang ih, cumi cun rundamnak a hringsuak. 11 Ziangahtile Cathianghlim in, «Zokhal amah zumtu cu ningzahter a si lo ding,» tiah a ti. 12 Ziangahtile Jew-mi le Grikmi karlakah zianghman danglamnak a um lo, ziangahtile Bawi pakhat cu an zate tlunih Bawi a si, amah kotu hmuahhmuah hnenah a lian a si. 13 Ziangahtile, «Zokhal Bawipaih hmin a kotu cu rundam a si ding.»

14 Amah an zum lo asile ziangtin amah cu an ko ding? Hna ih a thu an theih lo ah cun ziangtin so amah cu an zum ding? Cule phuangtu um loin ziangtin so hna ih an theih ding? 15 Cule thlah an si lo ah cun ziangtin so an phuan ding?

«Remnak thuthangṭha a phuangtu le
Lungawiumza thil ṭha thuthang a phuangtu pawlih ke cu ziang tlukin so a mawi!»

tiih ngan vek khan a si.

16 Asinan thuthangṭha cu mi hmuahhmuah in an lung lo. Ziangahtile Isaiah in, «Bawipa, zo in so kan thuthan mi a zum?» tiah a ti. 17 Curuangah zumnak cu hna ih theihnak in a ra ih, hna ih theihnak cu Pathian kamsuakthu ihsin a ra.

18 Asinan kei in, hna in an rak thei lo maw si? tiah ka ti. A si, thei taktak e,

«An aw cu leilung tlun hmuahhmuah a thangsuak ih,
An ṭawngkampawl cu leitlun dĕng tiang a thang,»

tiah ka ti.

19 Asinan kei in, Israel-mipawl in an theithiam lo maw si? tiah ka ti. A hmaisabikah Mosi in,

«Miphun si lo mi hmangin iksiknak ka lo neiter ding ih,
Miphun â hmangin ka lo thinhengter ding,»

tiah a ti.

20 Cule Isaiah cun ralṭha zetin,

«I hawl lo tupawl in in hmu;
Ka thu a zingzăwi lo tupawl hnenah keimah le keimah ka phuanglangaw,»

tiah a ti.

21 Asinan Pathian in Israel-mipawl hnenah,

«Thulung lo le thuelhmangpawl hnenah
Sunvu-in ka kut ka san,»

tiah a ti.

11

Israel cu Hnawn Lan ta a Si Lo

1 Asile Pathian in a minungpawl cu a hnáwng maw si? Hnáwng lamlam hlah! Ziangahtile kei khal Israel-mi, Abraham cithlah, Benjamin hnám ka si. 2 Pathian in a rak theih cia mipawl cu a hnáwng lo. Asilole Cathianghlim in Elijah thuhla a sim mi nan thei lo maw? Anih cun Israel-mipawl dokalhin Pathian hnenah a ngen, 3 «Bawipa, na profetpawl an that ih, na biakṭhengpawl an ṭhiatbăl. Keimah lawng ka tāng ih, ka nunnak la dingin an hawl,» tiah a ti. 4 Sikhalsehla Pathian in ziangtin a sawn? «Baal hmaiih khukbil dah lo mi 7000 ka hrangah ka rethim a si,» tiah a ti. 5 Cuvek thothoin tulai khalah Pathian in zangfahnak ih a hril mi a tāngsŭn an um a si. 6 Cule zangfahnak in a si ahcun, cuih hrilnak cu thil ti parih ṭhumaw mi a si nawn lo ding, cuti a si lo ahcun, zangfahnak cu zangfahnak a si nawn lo ding. Asinan thil ti parih ṭhumaw a si ahcun, zangfahnak in a si nawn lo ding; cutin asilole thil ti cu thil ti a si nawn lo ding.

7 Cuti asile ziangtin? Israel-mipawl in an hawl mi cu an ngah lo. Asinan hril mipawl cun an ngah ih, a tāng mipawlih thinlung cu a hak a si. 8 Cumi cu,

«Pathian in tuihni tiangin ihhmutnak thlarau,
Hmuh theilonak mit le,
Theih theilonak hna a pe hai,»

tiih ngan vek khan a si.

9 Cule David in,

«An cabuai cu tháng le miawhnak, tlûknak le
Lehrulhawknak ah cang seh.
10 An hmuh theilonak dingah an mit thim sehla, an el kûn lan ta seh,»

tiah a ti.

Israel Hnawnnak ih Tumtah Mi

11 Cuti asile, an tlûk lan tanak dingah an bah maw si? tiah kei in ka ti. Si lamlam hlah! An mawhsualnak ruangah Zentelpawl hnenah rundamnak a thleng sawn ih, cumi cun Israel-mipawl thintăwk ih, iksiknak an neih theinak dingah a si. 12 An mawhsualnak cun leitlun minungpawl hnenah lennak a thlĕn ih, an hlawhsămnak in Zentelpawl hnenah lennak a thlĕn a si ahcun, an famkimnak cun ziangtluk lennak thlĕn sinsin tak pei maw!

13 Keimah rori cu Zentelpawl hnenih apostol ka si ruangah nannih Zentelpawl hnenah ka lo sim, ka rawngbawlnak ka tluangkhawnpi a si. 14 Ziangmawtitiin taksa dānih ka miphunpawl in nahsuahnak an neih theinak dingah an thin ka thawhter ih, cutin mi hrekkhat tal ka run theinak dingah a si. 15 Ziangahtile anmah hnawnnak hman Pathian le leitlun mipawl remawknak a si ahcun, anmah cohlansalnak cu mithi lak ihsin nunnak a si lo ding maw?

16 Rah hmaisabik rawl thar cu a thianhlim asile, sang hlawm pumpi khal a thianghlim a si. Cun a hram a thianhlim asile, a hngeṭêkpawl khal an thianghlim. 17 Cule a hngeṭêk hrekkhat cu khiah an si ih, nang cu Olif thing sungah peh na si. Nang cu hramlak Olif thing men na si nân, atu ah cun, Olif thing ih hram le thau na ṭawm ve. 18 Hnawn mi hngeṭêkpawl thuhla ah tluangkhâwng hlah. Asinan na tluangkhawn asile, nang cun a hram na câwm lo ih, a hram in a lo câwm sawn ti mi hi cîng ringring aw.

19 Cutin nang in, «A sungih peh ka si theinak dingah a hngeṭêkpawl cu khiah an si,» tiah na ti ding. 20 Cumi cu a dik a si. An zum lo ruangah annih cu khiah an si, asinan nang cu zumnak in na ding. Nangmah le nangmah sâng tukah ruataw hlah aw, cuhnakin Pathian ṭihzah sawn aw. 21 Ziangahtile Pathian in a hngeṭêk taktakpawl a zuah lo asile, nang khal a lo zuah ve ce lo ding.

22 Curuangah Pathian ṭhatnak le a hrohrannak ruat aw. A tlu mipawl parah cun a hrohrang, asinan a ṭhatnak ih na umpeh vivo asile, anih cu na hrangah a ṭha a si. Culole nang khal a lo sattán ding. 23 Cule zumlonak ah an umpeh vivo lo asile, annih cu peh an si leh ding, ziangahtile Pathian cun anmah cu a pehsal thei. 24 Ziangahtile nang cu hramlak ih mah te kho mi Olif kung ihsin tan mi na si ih, dān kalhih cīn mi Olif kung ṭha sungih peh mi na si. Cumi cu a dik ruangah, ziangtluk nasa sinsinin ṭêk ngai a si mipawl kha anmai Olif kung ah peh si hai pei maw?

Israel Zate Rundam

25 Ziangahtile ka u le nau tla, hi thuthup hi thei loih nan um ding ka duh lo, cuti asilole mifim ah nan ruataw pang ding. Cuih thuthup cu hihi a si, Zentel mipum an kim lai hlanlo Pathian in Israel tamsawnih thinlung a hakter. 26 Cule cutin Israel-mi hmuahhmuah rundam an si ding. Cumi cu,

«Runsuaktu cu Zion ihsin a suak ding ih,
Jakob hnen ihsin Pathian ngaihsaklonak cu a lahlo ding.
27 Ziangahtile an sualpawl ka lakhloh tikah,
Cumi cu anmah thawi thukham ka tuah mi a si ding,»

tiih ngan vek khan a si.

28 Thuthangṭha lam thu ah cun nanmai hlawknak dingah annih cu thuthangṭha doral an si. Asinan hrilnak lam thu ah cun pupápawl ruangah annih cu Pathian-ih duhdawt mi an si. 29 Ziangahtile Pathian thilpekpawl le a kawhnak cu ṭhiah theih a si lo. 30 Ziangahtile a liam cia mi cān ah nannih in Pathian thu nan rak lun lo vek khan, thu an lun lo ruangah, atu ah zahngainak nan co riangri. 31 Zahngainak nan co theinak dingah, atu ah annih cu thu an lung lo. Cuih zahngainak nan conak zarin annih khal in zahngainak an co ve ding. 32 Ziangahtile mi hmuahhmuah parih zahngainak a neih theinak dingah Pathian in an zaten thulunlonak ah a khum ṭheh hai.

33 Aw, Pathian-ih fimnak lenzia le a theihnak lenzia cu an va thûk lawmmam ve!
A thuṭhennakpawl cu zohman in an hawlsuak theiin,
A lamzinpawl cu zohman in an va zawtsuak thei lo tak em!
34 «Ziangahtile Bawipaih lungthin thei zo a um?
Asilole zo so a thurawn mi si dah?»
35 «Asilole zo in a rulhsal leh dingin a hnenah thil pe hmaisa dah?»

36 Ziangahtile thil hmuahhmuah hi amai hnenin le amai ruangin le amai hrangah an si. A hnenah ropitnak cu um kumkhua seh! Amen.

12

A Nung mi Raithawinak

1 Curuangah ka u le ka nau tla, Pathian zahngainak ruangah nan taksaruangpum cu Pathian hnenah a nungih raithawi mi vekin le thianghlim le Pathian lunghmuitlakih hlan dingah ka lo ngen, cumi cu nan ti ding awm hrimhrim a si. 2 Cule a ṭha mi, pawmtlak le a famkim mi Pathian duhnak nan theihfiang theinak dingah, tulai san mipawlih nundān vekin nung loin, nan lungthin tharternak in thleng aw sawn uh.

Thlarau Thilpek

3 Ziangahtile Pathian in zumnak a lo pek tawkte fingfing vekin, nanmai lakih zohman in a ruahawk ding tawk hnakih sângin ruat aw hlah seh, ruahnak dikin ruat aw sawn seh tiah ka hnenih zangfahnak i pek mi thawngin ka lo sim a si. 4 Ziangahtile taksaruangpum pakhat ah pêng tampi kan nei, asinan cuih taksa pêng hmuahhmuah in hnaṭuan bangrep an nei lo. 5 Cuvekin kannih cu mi tampi kan si nân, Khrih ah taksaruangpum pumkhat kan si ih, a pâkpâk in pehzăwmawtăwn cio kan si. 6 Kan hnenih pek mi zangfahnak bangtukin thilpek phun dangdang kan nei cio. Thilpek cu profet thuphuan ih thu phuan asile, zumnak kan neih tawkin profet thuphuan in thu phuang uhsi. 7 Thilpek cu rawngbawlnak asile, cumi cu rawngbawlnak ah hmang uhsi. Thilpek cu zirhnak asile, mi zirh seh. 8 Thilpek cu mi dang tha va peknak asile, thazang mi pe seh. Thilpek cu peknak asile, siang zetin pe seh. Thilpek cu hruaitu sinak asile, taima zetin hruai seh. Thilpek cu zahngainak asile, lungawi zetin zahngainak nei seh.

Khristian Nun

9 Duhdawtnak cu a deu-in si hlah seh. A ṭha lo mi fih uhla, a ṭha mi kaihnget uh. 10 Unau duhdawtnak in pakhat le pakhat duat aw uh, nangmah le nangmah na upatawk hnakin, mi dang va upat sawn aw. 11 Zangzel hlah uh, nasazetin hna ṭuan uh, thatho zetin Bawipa rian uh. 12 Ruahsannak ah lungawiaipuangin um uh, harsatnak nan tawn tikah tuar ṭenṭo uhla, bâng loin thlacam uh. 13 A tlasam mi mithiangpawl thawn nan neih mi ṭawm aw uh, mikhual ṭhaten zoh uh.

14 A lo tiduhdahtupawl thlawsuah pe uh; thlawsuah pe uhla, camse hlah uh. 15 Lungawiaipuangih umpawl lungawiaipuangin umpi uhla, a ṭap mipawl ṭahpi uh. 16 Pakhat le pakhat lungthin hmunkhat pu-in um uh. Nanmah le nanmah sâng tukah ruat aw hlah uhla, dinhmun niampawl thawn kawm aw sawn uh. Mifim ka si tiah ruat aw hlah uh.

17 Zo hnen hmanah ṭhatlonak cu ṭhatlonak in lehrūl hlah uh. Mi hmuahhmuah hmaiah thil ṭha tuah ding ruat uh. 18 A cang thei asile, nan tithei tawkin mi hmuahhmuah thawn rem awin um uh. 19 Duhdawt mitla, phuba la hlah uh, cuhnakin Pathian thinlingnak kha hmun kian sawn uh. Ziangahtile, «Bawipa in phubalâk cu keimai ta a si, keimah in ka lehrūl ding a ti,» tiih ngan a si. 20 Curuangah,

«Na râl a ril a rawn asile, rawl pe aw,
A ti a hāl asile, in ding pe aw;
Ziangahtile cutiih na tuahnak in a lu parah meiling na retkhawm a si.»

21 Thil ṭhalo in lo neh hlah seh, thil ṭhalo cu thil ṭha in neh sawn aw.

13

Thuneitu hnenih Tlukluh

1 Mi kip in an tlunih thuneitu sângpawl hnenah tlulut hai seh. Ziangahtile Pathian ih dĭn lo mi thuneitu zohman an um lo ih, thuneitupawl hi Pathian ih ruat mi an si. 2 Curuangah zokhal thuneitu dokalhtu cu Pathian dĭn mi dokalhtu a si, cule cutiih a dokalhtupawl cu anmah le anmah thuṭhennak an coawter ding. 3 Ziangahtile uktupawl cu hnaṭuan ṭha a ṭuantu hrangah ṭihnung an si lo. Thil ṭhalo a tuahtu hrang lawngte ah cun ṭihnung an si. Thuneitu ṭihnak ihsin luat na duh maw? Thil ṭha tuah awla, thuneitu cun a lo lawm ding. 4 Ziangahtile thuneitu cu na hnenih thil ṭha tuah dingah Pathian rawngbawltu a si. Asinan thil ṭhalo na tuah asile, ṭih aw; ziangahtile anih cun ralnâm cu tumtah neiin a keng; ziangahtile anih cu thil ṭhalo tuahtu parih thinlingnak thlĕntu, phuleisamtu Pathian siahhlawh a si. 5 Curuangah thinlingnak ruang lawngah si loin, sia le ṭha theihnak ruang khalah a hnenah tlulut uh.

6 Cumi ruangah siah khal kimten nan pe, ziangahtile thuneitupawl cu Pathian siahhlawh an si. Annih cun cumi hrang rori ah catbang loin cān an pe. 7 Curuangah leiba nan neihnak hmuahhmuah hnenah nan leiba cu pe uh: siah nan bâk asile pe uh, ngunkhuai nan bâk asile pe uh, ṭihzah ding mi cu ṭihzah uh, upat ding mi cu upat uh.

Na Innhnen Duhdaw Aw

8 Pakhat le pakhat duhdawtawknak siarlo, zo hnen hmanah leiba nei hlah uh; ziangahtile mi dang a duhdawtu cun Dān a famkimter. 9 Ziangahtile Dān cun, «Na uire lo pei,» «Lai na that lo pei,» «Rûk na ru lo pei,» «Theihpinak diklo na rel lo pei,» «Mi thil na daw lo pei,» tiah a ti. Cuih thupekpawl le a dang thupek ziangkhal, «Nangmah le nangmah na duhdawtawk vekin na innhnen na duhdaw pei,» ti mi ṭawngkam pakhat in a khaikhawm ṭheh. 10 Duhdawtnak cun a innhnen parah thil ṭhalo a tuah lo; curuangah duhdawtnak cu Dān famkimnak a si.

11 Tulai thil umdān nan theih ruangah le ihthahnak ihsin ṭhangharh a cût zo ruangah, cumi cu tuah uh; ziangahtile atu ah cun kan rak zumtir lai hnakin kan rundamnak cu a nâi sinsin a si. 12 Zan hi a cem zikte thlang, khua a vâng zikte zo. Curuangah thim ih thil tipawl cu hlăwnin, tleu ih ralthuam cu hruh uhsi. 13 Zu hmun nuamcēnin le zuriin siseh, hursualin le fihnungza hursualnak tuahin siseh, toaw le nahsuahawin siseh um loin, sun ih um vekin mawi zetin um uhsi. 14 Bawi Jesu Khrih in thuam aw sawn uhla, tisa câkhiarnak tuah dingin tum cia hlah uh.

14

Khristian Zalĕnnak Umtuzia

1 Zumnak a cak lo mi cu rak cohlang uhla, ruahdān phun dangdang thu ah va êl ruri hlah uh. 2 Ziangahtile mi pakhat in thil ziang hmuahhmuah ka ei thei tin a zum, asinan a zumnak a cak lo mi pa cun hanghnahhangrah lawng a ei. 3 A eitu in a ei lo tu kha nautat hlah sehla, a ei lo tu khal in a eitu kha thuṭhen hlah seh; ziangahtile Pathian in anih cu a cohlang zo a si. 4 Mi dangih siahhlawh sawiseltu nang cu zo so na si? Cuih siahhlawh a din le a tlûk cu amai bawi rori ih hmaika-ah a si. A si, anih cu dinter a si ding, ziangahtile Pathian in anih cu a dingter thei a si.

5 Mi pakhat in ni khat cu ni dang hnakin thupisawn ah a ruat, mi dang pakhat in ni i kip in bangrepin a ruat. Mi tin anmai lungthin cio ah fiang hai seh. 6 Ni thupi ih a ruattu cun, Bawipa hrangah a ruat. Cule ni thupi ih a ruat lo tu cun, Bawipa hrangah a ruat lo a si. A eitu cun Bawipa hrangah a ei, ziangahtile a ei tikah Pathian hnenah lungawi thu a sim. A ei lo tu cun Bawipa hrangah a ei lo a si. A ei lo tikah, Pathian hnenah lungawi thu a sim. 7 Ziangahtile kan lakah zohman mai hrang lawngih nung kan um lo ih, mai hrang lawngih thi kan um lo. 8 Ziangahtile kan nun asile, Bawipa hrangah kan nung; kan thih khal asile, Bawipa hrangah kan thi. Curuangah kan nun ah siseh, kan thih ah siseh, Bawipaih ta kan si.

9 Ziangahtile Khrih a thi ih, a tho ih a nunsalnak săn bik cu a thi mipawl le a nung mipawl ih Lal a si veve theinak dingah a si. 10 Cuti asile ziangahso nang in na unaupa thu na ṭhen? Asilole ziangahso na unaupa na nautat? Ziangahtile Khrih-ih thuṭhennak tokham hmaiah kan zaten kan ding leh ding a si. 11 Ziangahtile,

«Bawipa in, ka nun rori vekin,
Ka hmaika-ah khuk hmuahhmuah an bil ding ih,
Pathian hnenah lei hmuahhmuah an phuangaw ding a ti,»

tiih ngan a si.

12 Curuangah kan zaten mai thuhla cio Pathian hnenah kan sim leh ding.

Tuahṭhatawktăwn

13 Curuangah pakhat le pakhat thuṭhensak aw nawn hlah uhsi, cuhnakin kan unaupaih lamzin ah bahnak simaw, tlûknak simaw ret lo dingin thutluknak tuah sawn uhsi. 14 Amah teih thianglo mi zianghman a um lo ti Bawi Jesu ah ka thei ih, ka fiang. Asinan mi pakhat in thil hrekkhat thianglo ih a ruah asile, a hrangah cumi cu a thiang lo. 15 Na ei mi in na unaupaih thin a natter asile, nang cu duhdawtnak ah na um nawn lo tinak a si. Na ei mi in a hrangih Khrih a thi mi na unaupa siatsuah hlah. 16 Curuangah nan thil ṭha kha thangsiat dingah cangter hlah uh. 17 Ziangahtile Pathian uknak cu ei le in lam thu a si lo, cuhnakin dingfelnak, hnangamdaihnak le Thlarau Thianghlim ih aipuannak a si sawn. 18 Ziangahtile cuti zawngih Khrih a riantu cun Pathian lung a awiter ih, minungpawl khal in amah cu an pawm.

19 Curuangah remawknak suaktertu thilpawl le pakhat le pakhat hngetawtăwntertu thilpawl cu dawi uhsi. 20 Rawl ruangah Pathian hnaṭuan cu siatter hlah. Thungaite ti ah cun thil ziangkim hi an thiang ṭheh, asinan a ei mi ruangih mi an bah asile, cucu a hrangah thil ṭhalo a si. 21 Na unau bahnak ding simaw, a tlûknak ding simaw, a cah lo phahnak ding simaw ah cun, sa ei le sabitzu in le thil ziangkhal na ti lo a ṭha. 22 Zumnak na nei maw? Na neih mi zumnak cu Pathian le nangmah karlakah kilkhawi aw. A pawm mi thil ih amah le amah thiamlo coawter lo tu cu mithlawsuak a si. 23 Asinan mi pakhat in a ei tikah a ringhlel asile, zumnak parah ṭhumawin a ei lo ruangah, amah le amah thiamlo a coawter a si. Ziangahtile ziangkhal zumnak parih ṭhumaw lo mi pauhpauh cu sual a si.

15

Mi dang Phurrit Phurhsak

1 A cak mi kannihpawl in mah le mah lunghmuiawter men loin, a cak lo mipawlih cahlonak kan phurhpi tengteng ding a si. 2 Tuahṭhatawknak thlĕntu dingah, an ṭhatnak dingah mai innhnen lunghmuiter tum cio uhsi. 3 Ziangahtile Khrih amah rori khal in amah le amah a lunghmuiawter lo,

«A lo hmuhsuamtupawlih mi hmuhsuamnak cu ka parah a tla,»

tiih ngan vek khan a si sawn.

4 Ziangahtile hlanih an rak ngan mi thil hmuahhmuah hi in zirhtu dingih an ngan mi a si. Ruahsannak kan neih theinak dingah Cathianghlim cun tuarfainak in neihter ih, tha in pe. 5 Khrih Jesu thawngin tuarfainak le thazang petu Pathian in pakhat le pakhat parah lungthin bangrep lo pe hram seh. 6 Cutin tumtah pakhat le kâ pakhat thawn kan Bawipa Jesu Khrih-ih Pa a si mi Pathian cu nan thangṭhat thei ding.

Pathian Sunlawihtlangnak

7 Curuangah Khrih khal in Pathian sunlawinak ding hrangih in cohlan vekin, pakhat le pakhat cohlangawtăwn uh. 8 Pupápawl hnenih Pathian in a pek mi thutiamkampawl hngetter dingah, Pathian thutak hrangah Jesu Khrih cu serh zim tan mipawlih siahhlawh ah a rung cang a si ti ka lo sim. 9 Cule Zentelpawl in a zahngainak ruangah Pathian an thangṭhat theinak dingah, Jesu cu siahhlawh ah a rung cang.

«Cumi ruangah Zentelpawl lakah na hmin ka phuang ding ih,
Na hmin thangṭhatnak hla ka sak ding,»

tiih ngan vek khan a si. 10 Cule anih in,

«Maw Zentelpawl, a minungpawl thawn lungawiaipuangin um uh,»

tiah a tisal. 11 Cun,

«Nannih Zentelpawl hmuahhmuah, Bawipa thangṭhat uh!
Nannih miphunpawl hmuahhmuah amah cu thangṭhat uh!»

tiah a tisal. 12 Cule Isaiah in,

«Jesse-ih Búlhram a um ding ih,
Amah cu Zentelpawl uk dingih a ra lang ding mi pa a si.
Amah ah Zentelpawl in ruahsannak an nei ding,»

tiah a tisal.

13 Nan zum vekin ruahsannak petu Pathian in aipuannak le hnangamdaihnak hmuahhmuah thawn lo khatter hram seh, cutin Thlarau Thianghlim huham in ruahsannak thawn nan khatliam ding.

Paul in hi Cakuat a Ngannak Săn

14 Ka u le ka nau tla, nannih cu ṭhatnak in nan khat, theihnak hmuahhmuah thawn nan khat, pakhat le pakhat nun zirhaw thei khal nan si ti cu keimah rori in ka theifiang. 15 Sikhalsehla u le nau tla, thil hrekkhat thu thawn pehparawin lo mángsuaktersal dingah Pathian ih i pek mi zangfahnak ruangah, ralṭha zetin nan hnenah ca ka ngan a si. 16 Cutin Zentelpawl hnenah Khrih Jesu-ih rawngbawltu le Pathian-ih thuthangṭha rawngbawl ka si thei ding. Cutin Zentelpawl cu Pathian cohlantlak thilhlăn an si theinak dingah Thlarau Thianghlim in a thianghlimter hai.

17 Curuangah kei cu Pathian lam thu ah Khrih Jesu ah cun tluangkhawn ding ka nei a si. 18 Ziangahtile Zentelpawl in thu an lun theinak dingah keimah hmangih ṭawngkam le thil ti ih Khrih ih a ṭuan ṭheh mi siarlo thil dang zianghman ka sim ngam lo. 19 Cumi cu Pathian Thlarau huham in hminsinnak huhampawl le mangbangza hnaṭuannakpawl ih a cang mi a si. Cutin Khrih thuthangṭha cu Jerusalem ihsin Illirikam ram kiangkap hmuahhmuah tiangin ka phuang thluh zo. 20 Mi ih lungphum phum cia mi parih ka sakbetlonak dingah Khrih hmin theihlonak hmun ah thuthangṭha phuan ding cu ka tumtah ringring mi a si. 21 Asinan,

«Amai thu an rak sim dah lo mipawl in an hmu ding ih,
Hna ih a rak thei dah lo pawl in an theithiam ding,»

tiih ngan vek khan a si.

Rom Tlawn Tumnak

22 Cumi cun nan hnen ra thei lo dingin i kham ṭheu. 23 Asinan atu ah cun cuih rampawl ah hnaṭuannak ding hmunram ka nei nawn lo. Cule nan hnenih rat ka hiar zetnak hi kum a rei tuk zo. 24 Spain ka tlawn tiktikah, nan hnenah ka ra ding. Ziangahtile ka tlawn phahah lo hmuh rori ka beisei ih, nanmah thawi pawlkawmawknak khawp tawk kan neih hmaisak hnuah, Spain lam ka fehnak ah in bawm ding tiin ka beisei. 25 Asinan atu cu mithiangpawl rian dingin Jerusalem ah ka feh ta ding. 26 Ziangahtile Masidonia peng le Akaia peng pawl ih mipawl in Jerusalem ih mithiangpawl lakih mifarahpawl băwmnak sumpai kuat ding cu an lung a hmui zet. 27 Cucun an lung a hmuiter ih, annih cu an hnenih leiba nei an si. Ziangahtile Zentelpawl in thlarau lam thilpawl ah Jew-pawl an rak ṭawmpi zo a si ahcun, taksa thil ih va hlawm ve ding cu an ṭuanvo a si. 28 Curuangah hih ṭuanvo ka ṭheh ih, cuih băwmnak sumpai cu an hnenih himteih ka pekngahfel hnuah Spain ka tlawn phahah ka ra lo tlawng ding. 29 Cule nan hnenih ka rat tikah, Khrih thuthangṭha-ih thlawsuahnak ih khatin ka ra ding ti ka thei.

30 Ka u le ka nau tla, kan Bawipa Jesu Khrih zarin le Thlarau hnen ihsin duhdawtnak thawngin ka hrangah Pathian hnenih thla nan camnak ah ṭan in lakpi hram dingin ka lo ngen hai, 31 cutin Judia peng ih zumlotupawl hnen ihsin Pathian in i run ding ih, Jerusalem ih ka rawngbawlnak cu, cutawk ih mithiangpawl hrangah pawmtlak a si ding. 32 Pathian duhnak in nan hnenah aipuannak thawn ka ra ding ih nanmahpawl thawn hmunkhatah kan tiharhaw ding a si. 33 Hnangamdaihnak petu Pathian cu nan zate hnenah um hram seh. Amen.

16

Bulpak Cibaibûknak

1 Kenkeria khua kawhhran siahhlawh, kan farnu Fibi hi nan hnenah lo theihter ka duh. 2 Mithiangpawl ih tuah ding mawi a si vekin Bawipa ah amah cu cohlang uhla, a ṭul mi kip kha rak bawm uh. Ziangahtile anih cu mi tampi bawmtu le keimah i bawmtu khal a si.

3 Khrih Jesu ih ka hnaṭuanpi Prisila le Akuila kha cibai i rak bûksak uh. 4 Annih cu ka nunnak hrangih anmai hngawng rori thāptu an si. Keimah lawng si loin, Zentel kawhhran zate khal in an parah lungawi thu an sim a si.

5 Cuvek thothoin an inn ih kawhhran khal kha cibai i bûksak uh.

Akaia peng ih Khrih hrangih arah hmaisabik a si mi, ka duhdawt mi Epeneṭas kha cibai i bûksak uh.

16:5a rah hmaisabik: Zumtu hmaisabik.

6 Kan hrangah nasazetih hnaṭuantu Mary kha cibai i bûksak uh.

7 Ka sungkhat le ka thawngtlakpi Andronikas le Junia kha cibai i rak bûksak uh. Annih cu apostolpawl lakah mithupi an si ih, ka hlanih Khrih sungih rak um zo khal an si.

8 Bawipa ih ka duhdawt mi Amfelias kha cibai i bûksak uh.

9 Khrih ih kan hnaṭuanpi Urbanas kha cibai i bûksak uh.

Cule ka duhdawt mi Stakhis kha cibai i bûksak uh.

10 Apelles kha cibai i bûksak uh. Anih cu Pathian in Khrih ah a pawm. Aristobulas teih sungkua ih umpawl kha cibai i bûksak uh.

11 Ka sungkhat Herodion kha cibai i bûksak uh. Bawipa ah a um mi Narkisas-ih sungkua ih umpawl kha cibai i bûksak uh.

12 Bawipa ah nasazetih hnaṭuantu nunau Traifena le Traifosa kha cibai i bûksak uh.

Mi kip ih an duhdawt mi Persis kha cibai i bûksak uh. Cu nu cun Bawipa ah nasazetin hna a ṭuan a si.

13 Pathian in Bawipa ah a hril mi, Rufus kha cibai i bûksak uh. Ka hrang khalih nu a si ve mi a nu kha cibai i bûksak uh.

14 Asinkriṭas, Felekon, Hermas, Patrobas, Hermes le an hnenih um mi unaupawl kha cibai i bûksak uh.

15 Filolokas, Julia, Nerias le a naunu, Olimpas le an hnenih um mithiang hmuahhmuah kha cibai i bûksak uh.

16 Pakhat le pakhat hnămawknak thianghlim thawn cibaibûk aw uh. Khrih kawhhran hmuahhmuah in cibai an lo bûk a si.

Thapeknak Netabik

17 Ka u le ka nau tla, tha ka lo pe a si. Ṭhenawknak suaktertupawl le nan rak zir zo mi zirhnak kalh zawngih mitlutertupawl lakah va fimkhur uhla, anmah cu hrial uh. 18 Ziangahtile cuvek mipawl cun kan Bawipa Jesu Khrih rian loin, anmai pumpi an rian sawn a si. Cun ṭawngkam nem le mi pawrhnak in mitluangtlampawlih thinlung an bum. 19 Ziangahtile thu nan lunnak cu mi hmuahhmuah in an rak thei zo. Curuangah nanmah ruangah lungawinak in ka khat. A ṭha mi ah fim in, a ṭha lo mi ah tluangtlam uhla ka duh. 20 Cule hnangamdaihnak petu Pathian in Setan cu nan ke hnuaiah a palbêk cing ding.

Kan Bawipa Jesu Khrih-ih zangfahnak cu nan hnenah um hram seh. Amen.

Paul-ih Rualpipawl hnen ihsin Cibaibûknak

21 Ka hnaṭuanpi Timothy le ka sungkhat Lusias, Jason le Sosipaṭa pawl in cibai an lo bûk.

22 Hi cakuat ngantu, keimah, Tersias in Bawipa ah cibai ka lo bûk hai.

23 Keimah le kawhhran pumpi ih intêk a si mi Kaias in cibai a lo bûk.

Khawpi sumkiltu Erasṭas le unaupa Kuarṭas tla in cibai an lo bûk.

24 Kan Bawipa Jesu Khrih-ih zangfahnak cu nan zate hnenah um hram seh. Amen.

Pathian Thangṭhatnak

25 Ka thuthangṭha le Jesu Khrih thuhla phuan mi zulhin, cān thăwk hlan ihsi rak thuh mi si hman sehla atu ih phuanlăng a si mi, 26 profetpawl ih ngan mi hmangih miphun hmuahhmuah hnenih theihter mi zulhin le kumkhaw Pathian-ih thupek bangtukin, zumnak ah thulung dingih a lo hngetter theitu, 27 amah lawng Pathian fim a si mi hnenah, Jesu Khrih thawngin ropitnak cu kumkhuain um hram seh. Amen.